İmişlidə 10 yaşlı Rasim Xankişyevin itkin düşməsi ilə bağlı başlanan, sonradan dayandırılan cinayət işi üzrə icraat yenidən bərpa edilib.

Bu barədə APA-nın Mil-Muğan bürosuna hüquq müdafəçisi Samir Zeynalov məlumat verib.

S.Zeynalov deyib ki, Xankişiyev Rasim Vasif oğlunun 26 dekabr 2023-cü il tarixdə müəmmalı şəkildə itkin düşməsi faktı ilə bağlı ötən həftə İmişli rayon prokurorluğunda cinayət işi üzrə icraatın dayandırılması haqqında qərar qəbul edilib: “Qərardan məhkəməyə şikayət vermək nəzərdə tutulurdu. Lakin mayın 10-da İmişli rayon prokuroru Valeh Səmədovun qəbulunda olduğumuz zaman icraatın təzələnməsi haqqında qərar qəbul edildiyini öyrəndik.

Eyni zamanda o da məlum oldu ki, ərazidə olan müşahidə kameraları ətrafı geniş və aydın şəkildə müşahidə etdiyindən bu barədə də sorğu ilə aidiyyəti üzrə müraciət edilib”.

Bildirilib ki, hazırda əməliyyat-axtarış, istintaq tədbirləri davam etdirilir.

Qeyd edək ki, 2013-cü il təvəllüdlü Xankişiyev Rasim Vasif oğlunun Boztəpə kanalının İmişli rayonunun Qaragüvəndikli kəndi ərazisindən keçən hissəsində batması ehtimal olunub. FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupu tərəfindəmn ərazidə axtarış-xilasetmə əməliyyatı aparılıb, nəticə əldə etmək mümkün olmayıb.

Sosial şəbəkədə azyaşlının yük avtomobili tərəfindən vurulduğu, daha sonra iz itirmək məqsədi ilə kanala atılması barədə məlumatlar yayılıb.