“Hazırda ölkəmizdə qeyri-neft sektorunda ixracın payının artırılması ilə bağlı bir sıra işlər görülür. Bunlardan biri ixrac edən sahibkarlarla bağlı assosiasiyaların yaradılmasıdır. Onların problemləri araşdırılır və ixracının asanlaşdırılması ilə bağlı işlər görülür. Digər məsələ isə ölkədə, xüsusən qeyri-neft sektorunun inkişafı ilə bağlı olaraq müəssisələrin açılması üçün subsidiyalaşma, dövlət zəmanətli vəsaitlərin verilməsinin həcmi də artırılır”.

Bu fikirləri xalqcəbhəsi.az-a açıqlamasında iqtisadçı ekspert Ruslan Atakişiyev deyib.

R.Atakişiyev bildirib ki, sahibkarara Kiçik və Orta Biznesin İnkişafı Agentliyi (KOBİA) vasitəsilə təlimlər keçirilir, ixracla bağlı məsləhətlər verilir, o cümlədən KOB klasterlər yaradılmağa başlayıb: “Bu da Azərbaycan mənşəli məhsulların istehsal edilməsi üçün klaster şirkətlərin qurulmasından ibarətdir ki, həmin klaster şirkətlər qurulduğu zaman Azərbaycan məhsullarının xaricə ixracı imkanları daha da genişlənə bilər”.

İqtisadçı qeyd edib ki, beynəlxalq bazarların araşdırılması, xaricdə mövcud olan Azərbaycan nümayəndəlikləri vasitəsilə orada Azərbaycan məhsullarının tanıdılması, xaricdə keçirilən sərgilərə Azərbaycan sahibkarlarının bir hissəsinin dövlət hesabına göndərilməsi, o cümlədən xarici müəssisələrdə Azərbaycan gəlirlərinin biznes forumlarının keçirilməsi və s. bu kimi vasitələrlə ölkənin istehsal olunan məhsullarının ixracatının artırılması sırasında işlər aparılır: “Son dövrlər biz görürük ki, işğaldan azad olunmuş ərazilərdə də əkin-biçin, istehsal prosesi həyata keçirilir. Bu da Azərbaycan iqtisadiyyatının böyüməsi, ixrac qabiliyyətinin artmasına gətirib çıxara bilər”.

Röya İsrafilova