Əfqanıstan və Pakistan nümayəndələri Çinin iştirakı ilə yaradılmış üçtərəfli mexanizm çərçivəsində sərhəddəki münaqişənin nizamlanması üçün danışıqlar aparırlar.

Xalqcebhesi.az xəbər verir ki, bu barədə "Dawn" qəzeti Pakistan Xarici İşlər Nazirliyindəki mənbəyə istinadən məlumat yayıb.

"Çinin Urumçi şəhərində keçirilən danışıqlar, daha əvvəl bu görüşün təşkili üçün ÇXR-ə müraciət edən Əfqanıstanın təşəbbüsü ilə başlayıb", — deyə qəzetin həmsöhbətləri bildirib. "Çinin bu görüşlərin keçirilməsinə köməkliyi İslamabad və Kabil arasındakı münasibətlərin nizamlanmasında vasitəçilik kimi qiymətləndirilmir".

Mənbələrin bildirdiyinə görə, Xarici İşlər və Daxili İşlər nazirliklərinin, eləcə də Pakistan Silahlı Qüvvələrinin nümayəndələrinin iştirak etdiyi Urumçi görüşünün məqsədi, ikitərəfli sərhəddəki hərbi münaqişənin dayandırılması yolları barədə Əfqanıstanla fikir mübadiləsi aparmaqdır. Çin qarşılıqlı etimadın möhkəmləndirilməsi üçün ilk addım kimi iki ölkə arasında ticarətin bərpa edilməsinə çağırış edir.

Məryəm Quliyeva