Yaxın Şərqdə baş verən proseslər təkcə regional deyil, qlobal güc balansına təsir edəcək səviyyədədir. İran kimi böyük bir dövlətə qarşı hərbi və siyasi təzyiqlərin artması dünya enerji bazarından tutmuş beynəlxalq siyasi münasibətlərə qədər bir çox istiqamətdə ciddi dəyişikliklər yarada bilər.

Bunu politoloq Vaqif Hüseyn “Xalqcebhesi.az”a açıqlaması zamanı deyib.

Politoloqun sözlərinə görə, İran ətrafında baş verənlər Yaxın Şərqin gələcəyindən daha çox, qlobal güclər arasında yeni balansın formalaşması ilə bağlıdır:

“Fakt budur ki, Yaxın Şərqin ən böyük dövlətlərindən birinə qarşı ciddi təzyiq siyasəti həyata keçirilir. İranın zəiflədilməsi və ya nəzarət altına alınması təkcə regionun deyil, bütün dünyanın siyasi və iqtisadi balansını dəyişə bilər. Bu, enerji resurslarının müəyyən güclərin nəzarətinə keçməsi deməkdir”.

Vaqif Hüseyn bildirib ki, bu prosesin nəticələri Çin, Rusiya və Türkiyə kimi böyük regional və qlobal aktorların maraqlarına da birbaşa təsir göstərəcək:

“İranın geosiyasi mövqeyi və enerji potensialı nəzərə alınanda burada baş verən hər hadisə avtomatik olaraq Çin, Rusiya və Türkiyə üçün də strateji nəticələr yaradır. ABŞ-ın bölgədə atdığı addımlara qarşı müqavimətin əsas səbəblərindən biri də məhz budur”.

Politoloq hesab edir ki, prosesin necə yekunlaşacağını indidən proqnozlaşdırmaq çətindir:

“Əgər ABŞ bölgədə tam dominant mövqe əldə edərsə, bu, Avropanın enerji baxımından daha çox Vaşinqtondan asılı vəziyyətə düşməsinə səbəb ola bilər. Yəni söhbət yalnız Yaxın Şərqdən getmir, bu, bütün dünyadakı güc balansını dəyişdirə biləcək bir prosesdir”.

Günel Elxan