Ermənistan Qarabağdakı vəziyyətə görə Azərbaycanla hərbi əməliyyatlara başlamaq niyyətində deyil.

Trend xəbər verir ki, bunu Ermənistan baş naziri Nikol Paşinyan hazırda keçirdiyi brifinqdə bildirib.

"Ermənistan hərbi əməliyyatlarda iştirak etmir və bir daha demək istəyirəm ki, Ermənistan Respublikasının Dağlıq Qarabağda ordusu yoxdur. Hazırda biz heç bir tələsik addım atmayacağıq", - deyə o bildirib.

Qeyd edək ki, üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanılıb.