"Qarabağ"ın UEFA Çempionlar Liqasının pley-off mərhələsindəki rəqibi olan İngiltərənin "Nyukasl" klubunun baş məşqçisi Eddi Hau komandadakı zədəlilərin son durumu barədə məlumat verib.

48 yaşlı mütəxəssis bu barədə İngiltərə Premyer Liqasının XXV turunun "Brentford"la keçiriləcək matçdan öncə mətbuat konfransında danışıb.

Haunun bildirdiyinə görə, həftə içi Liqa Kubokunun yarımfinalında "Mançester Siti"yə qarşı keçirilən oyunda zədələnən Entoni Qordonun durumu hələ də qeyri-müəyyəndir: "Entoninin vəziyyəti ilə bağlı yenilik yoxdur. Onun şənbə günü baş tutacaq oyunu qaçırmaq ehtimalı yüksəkdir, lakin ümid edirik ki, zədəsi ciddi deyil və tezliklə sıralarımıza qayıdacaq".

Buna baxmayaraq, "sağsağanlar"ın düşərgəsində müsbət xəbərlər də var. Eddi Hau zədədən qayıdan kapitan Bruno Gimaraynş və gənc yarımmüdafiəçi Lüis Maylinin "Brentford"la matça hazır ola biləcəyinə ümid etdiyini deyib.

"Nyukasl" - "Brentford" matçı fevralın 7-də Bakı vaxtı ilə saat 21:30-da start götürəcək.

Qeyd edək ki, "Qarabağ" "Nyukasl"la fevralın 18-də Bakıda, bir həftə sonra isə İngiltərədə qarşılaşacaq.