“Artıq bir müddətdir ki, biz Gürcüstanda proseslərin daha da gərginləşdiyini görürük. Bu gün vəziyyət yaxşı istiqamətə getmir, Qərb çalışır ki, Gürcüstanda öz hədəflərinə və məqsədlərinə nail olsun. Küçələrdəki qarşıdurmalara Gürcüstan Prezidenti də qoşulub. Bu da yaxşı bir vəd vermir və prosesin gələcəkdə daha da gərginləşəcəyini göstərir”.

Bunu xalqcəbhəsi.az-a açıqlamasında Milli Məclisin deputatı Ceyhun Məmmədov deyib.

O bildirib ki, bu gün biz Qərbin daha bir zorakı fəaliyyətini, addımlarını açıq-aydın Gürcüstan nümunəsində görürük: “Yəni onlar bir tərəfdən başqa bir məlumatı qeyd edirlər, demokratiyanı dəstəklədiklərini deyirlər, amma digər tərəfdən isə Gürcüstanda legitim hakimiyyətə qarşı müəyyən addımlar atırlar, tədbirlər görürlər. Ona görə də biz çalışmalıyıq ki, bu istiqamətdə proseslərə öz qiymətimizi verək. Biz uzun müddətdir Qərbin Azərbaycanda bir sıra addımlar atmağa çalışdığını görürük. Hesab edirəm ki, o anlamda da bu proseslər bizim üçün olduqca maraqlıdır. Bu istiqamətdə Azərbaycan öz mövqeyini hər zaman ortaya qoyub, bu gün də qoyur. Biz hər bir məsələyə sivil, mədəni yanaşmanın tərəfdarıyıq. Hesab edirik ki, Qərbin Gürcüstanda etmək istədiyi düzgün bir məsələ, addım deyil. Bu həm də Gürcüstanın daxili işlərinə müdaxilə və qarışmaqdır. Onlar Gürcüstanın daxili işlərinə qarışırlar və müəyyən proseslərin də həyata keçməsinə çalışırlar. Bu, qəbuledilməz bir addım, problem yaradan bir məsələdir. Biz də bu istiqamətdə çalışmalıyıq ki, ölkəmizə təsirlərinin qarşısının alınması üçün müəyyən addımlar ataq və tədbirlər görək”.

Röya İsrafilova