Keniyanın paytaxtı Nayrobi yaxınlığında şir hücumuna məruz qalan 14 yaşlı qız ölüb.

Keniya Vəhşi Təbiət Xidmətinin (KWS) verdiyi açıqlamaya görə, hadisə Nayrobi Milli Parkının düz yanındakı ferma evində baş verib. Şir gənc qızı yaşadığı ərazidən qaçırıb.

Başqa bir azyaşlı uşaq bunu görüb səlahiyyətliləri xəbərdar etdikdən sonra KWS qrupları hərəkətə keçib və Mbagathi çayının sahilində qızın cansız bədənini tapıb.

Səlahiyyətlilər şirin hələ tapılmadığını, lakin tələ qurulduğunu və əraziyə axtarış qruplarının göndərildiyini bildirib. Qurum oxşar hadisələrin baş verməməsi üçün əlavə təhlükəsizlik tədbirlərinin görüldüyünü də açıqlayıb.