NATO-nun müdafiə nazirləri Alyansın “yeni qabiliyyət hədəfləri” üzərində anlaşmaq üçün Brüsseldəki qərargahında görüşüblər.

Xalqcəbhəsi.az “Haber Global”a istinadla qeyd edir ki, iclasda açılış nitqi ilə NATO-nun baş katibi Mark Rutte çıxış edib. Rutte, "Bu gün biz çəkindirici qüvvəmizi və müdafiəmizi güclü saxlamaqla 1 milyard insanımızın təhlükəsizliyini təmin etmək üçün iddialı yeni qabiliyyət hədəfləri toplusunu razılaşdıracağıq" deyib.

Bu hədəflərə çatmaq üçün daha çox xərc tələb olunduğunu vurğulayan Rutte, müdafiə xərclərinə dair yeni meyarın 24-25 iyun tarixlərində Haaqada keçiriləcək sammitdə liderlər tərəfindən müəyyən ediləcəyini açıqlayıb. Ukraynanın müdafiə naziri Rustem Umerov və Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallasın da qatılacağı toplantıda Türkiyəni Milli Müdafiə naziri Yaşar Gülər ​​təmsil edəcək.