Dobrindt: Almaniya İsraillə birgə "Kiberkubok" yaradacaq

Almaniya müdafiə sahəsində İsraillə əməkdaşlığını genişləndirməyi və İsrailin kibertəhlükəsizlik sisteminə bənzər "Kiberkubok" adlandırılan bir sistem yaratmağı planlaşdırır.

Xalqcebhesi.az xəbər verir ki, bu barədə İsraildə səfərdə olan Almaniyanın daxili işlər naziri Aleksandr Dobrindt məlumat verib, – deyə Bild yazır.

Nazir İsrailin hava hücumundan müdafiə sistemlərinin yüksək effektivliyini vurğulayıb – bu sistem sayəsində İranın raketləri və pilotsuz uçuş aparatlarının əksəriyyəti vurulub. Bundan əlavə, kibermühitdə İranın hücum cəhdlərinin qarşısını alan mütəxəssislərin də rolu böyük olub. Bu təcrübədən ilhamlanan Dobrindt Almaniyada "Kiberkubok" qurmaq niyyətindədir.

Nazirin təşəbbüsü bir neçə strateji istiqaməti əhatə edir. Xüsusilə, Almaniya ilə İsrail arasında kibertəhlükəsizlik sahəsində əməkdaşlığın genişləndirilməsi, Almaniyanın Federal Kəşfiyyat Xidməti (BND) ilə İsrailin "Mossad" təşkilatı arasında əlaqələrin dərinləşdirilməsi nəzərdə tutulur.
Bundan əlavə, pilotsuz uçuş aparatlarına qarşı mübarizə vasitələrinin təkmilləşdirilməsi və mülki müdafiə sistemlərinin, o cümlədən əhalinin vaxtında xəbərdar edilməsi mexanizmlərinin gücləndirilməsi planlaşdırılır. İsrailin mobil tətbiqlər və sığınacaqlardan uğurla istifadə etməsi nümunə kimi göstərilir.

Qeyd olunur ki, Dobrindt 12 günlük İran-İsrail müharibəsindən sonra İsraili ziyarət edən ilk alman siyasətçidir. Səfərin məqsədi həmrəyliyi ifadə etmək və yeni tərəfdaşlığın planlaşdırılması olub.

O, daha əvvəl Almaniyada sərhəd nəzarətinin gücləndiriləcəyini və miqrasiya siyasətinin sərtləşdiriləcəyini də bəyan etmişdi.

Məryəm Quliyeva