Kreml sözçüsü Dmitri Peskov, ABŞ Prezidenti Donald Trampın Ukraynaya silah göndərişinə başlayacağı və Rusiyaya sanksiya tətbiq edə biləcəyi ilə bağlı açıqlamalarına münasibət bildirib.

Xalqcebhesi.az xəbər verir ki, Peskov, Trampın Rusiya Prezidenti Vladimir Putini birbaşa hədəf alan ifadələr səsləndirdiyinə diqqət çəkərək, bu açıqlamaların müharibənin davam edəcəyinə işarə etdiyini vurğulayıb.

Moskvada jurnalistlərə danışan Peskov, ABŞ, NATO və Brüsseldə Ukraynaya əlavə silah göndərilməsi ilə bağlı verilən qərarları tənqid edib. O deyib:
“Bu qərarların Ukrayna tərəfindən sülh niyyəti deyil, müharibənin davamına dair bir siqnal kimi qəbul edildiyinə heç bir şübhə yoxdur.”

Peskov əlavə edib ki, Prezident Putin lazım bilsə, Trampa cavab verəcək:“Trampın açıqlamaları olduqca ciddidir. Bu açıqlamalarda şəxsən Putinə yönəlik fikirlər var. Vaşinqtonda deyilənləri analiz etmək üçün bizə mütləq vaxt lazımdır.”

Rusiya üçüncü tur danışıqlara hazırdır

Peskov bildirib ki, Rusiya Ukrayna ilə üçüncü tur sülh danışıqlarına başlamağa hazırdır və bu barədə təqvim təklifi üçün Ukraynadan cavab gözləyir.

Məryəm Quliyeva