Yeni bir araşdırma tropik fırtınalardan sonra ürək-damar xəstəlikləri üçün xəstəxanaya müraciət edənlərin sayında artım müşahidə edib.

Xalqcebhesi.az xəbər verir ki, Avstraliyanın Monaş Universiteti və Yeni Zelandiyanın Otaqo Universitetinin alimləri 2000-2019-cu illər arasında Kanada, Yeni Zelandiya, Cənubi Koreya, Tayvan, Tayland və Vyetnamda xəstəxanalara müraciət edən xəstələrin qeydləri ilə yanaşı, eyni dövrə aid 124 tropik qasırğanın məlumatlarını araşdırıblar.
Araşdırmada ürək-damar xəstəlikləri səbəbiylə xəstəxanaya müraciətlərin artdığı, bu artımın tropik fırtınalardan təxminən 2 ay sonra pik həddinə çatdığı və xəstələrin sayındakı artımın 6 aya qədər davam etdiyi müəyyən edilib.
Nəticələr hər iki cinsdən olan 20-59 yaş arası insanlar arasında fırtınalar və ürək-damar xəstəliklərinin xəstəxanaya yerləşdirilməsi arasında statistik cəhətdən əhəmiyyətli və uzunmüddətli əlaqə olduğunu göstərib.
Otaqo Universitetinin tədqiqatçısı Simon Hales, "Tədqiqat göstərir ki, iqlim hadisələri təkcə birbaşa ölüm və xəsarətlərə səbəb deyil, həm də fəlakətdən sonrakı aylarda sağlamlığa əhəmiyyətli dolayı təsir göstərir". Hales, bu gecikmiş dolayı sağlamlıq təsirlərinin böyük fırtınalardan sonra infrastrukturun zədələnməsi və dolanışıq vasitələrinin pozulması ilə əlaqədar olduğunu bildirdi. Araşdırmanın təfərrüatları Science Advances jurnalında dərc olunub.

Məryəm Quliyeva