İndoneziyanın şərqində Yavada yerləşən Semeru vulkanı və Şərqi Nusa Tengqara əyalətindəki Levotobi Laki-Laki vulkanı püskürüb.

Xalqcebhesi.az xəbər verir ki, Antara News-un məlumatına görə, Semeru Vulkan Müşahidə Bürosunun səlahiyyətliləri Semerunun yerli vaxtla 09:38-də püskürdüyünü və dağın püskürdüyü külün dəniz səviyyəsindən təxminən 4,6 kilometr yüksəkliyə çatdığını qeyd edib.

Səlahiyyətlilər Semeru vulkanının 2-ci Həyəcan Səviyyəsində qaldığını və zirvədən 8 kilometr uzaqlıqda yerləşən Besuk Kobokan bölgəsinin cənub-şərq hissəsində bütün fəaliyyətlərin qadağan edildiyini bildirib.

Semeru vulkanında püskürmədən sonra yerli vaxtla saat 14:05-də Şərqi Nusa Tengqarada yerləşən Lewotobi Laki-Laki vulkanında da püskürmə baş verib.

Səlahiyyətlilər, Levotobi Laki-Laki vulkanında vulkanik kül buludunun dəniz səviyyəsindən təxminən 1,7 kilometr yüksəkliyə çatdığını bildirib.

"Sakit Okean Atəş Halqası" zəlzələsi və vulkanik qurşağında yerləşən İndoneziyada 130-a yaxın aktiv vulkan var.

Məryəm Quliyeva