Boliviya Prezidenti Luis Arce Santa Cruz, Cochabamba və Noel Kempff Mercado bölgələrində yanğınlarla mübarizə apardıqlarını bildirərək Nazirlər Şurasının qərarı ilə fövqəladə vəziyyət elan edildiyini qeyd edib.

O, yanğınların daha da genişlənə biləcəyini vurğulayaraq beynəlxalq həmrəylik və yardımların ölkəyə sürətlə çatdırılması üçün çalışdıqlarını deyib.

Mülki Müdafiə Nazirinin müavini Xuan Karlos Kalvimontes bildirib ki, yanğınsöndürənlər və hərbi qruplar yanğınlara nəzarət və biomüxtəlifliyin qorunması üçün intensiv işləyirlər.

Qeyd edək ki, iyun ayından bəri ölkədə müxtəlif nöqtədə 720 yanğın baş verib. 2024-cü ildə meşə yanğınları nəticəsində isə 12 milyon hektardan çox ərazi zərər görüb.