ABŞ-ın vitse-prezidenti Cey Di Vens, Donald Tramp ilə bağlı “hər hansı bir faciə” baş verəcəyi təqdirdə ölkəyə rəhbərlik etməyə hazır olduğunu bildirib.

Xalqcebhesi.az xəbər verir ki, o, bu barədə USA Today-ə verdiyi müsahibədə danışıb.

Hakimiyyətin ötürülməsi məsələsinə dair sualı cavablandıran Vens son aylarda qazandığı təcrübənin onu ölkənin ən yüksək vəzifəsini icra etməyə qiymətsiz şəkildə hazırladığını vurğulayıb:

“Son 200 gündə əldə etdiyim təcrübədən daha yaxşı bir hazırlıq təsəvvür edə bilmirəm”, – deyə vitse-prezident qeyd edib.

Xatırladaq ki, Vens 2024-cü il prezident seçkilərində Donald Trampın qələbəsindən sonra vitse-prezident vəzifəsinə gətirilib. O, Ohayodan keçmiş senator olmaqla, Trampın administrasiyasında ən sadiq tərəfdarlarından və əsas fiqurlarından biri hesab olunur.

Məryəm Quliyeva