Cənubi Koreyanın Tbilisidəki səfiri Hyondu Kim Gürcüstanın Xarici İşlər Nazirliyinə (XİN) dəvət olunub.

APA-nın yerli bürosu xəbəri verir ki, bu barədə XİN-dən bildirilib.

Xarici işlər nazirinin müavini Aleksandre Xvtisiaşvilinin səfirlə keçirdiyi görüşdə Abxaziyanın “mədəniyyət naziri”nin Koreya parlamentini ziyarət etməsi və Seulda “Abxaz Mədəniyyət Mərkəzi”nin açılması məsələsi müzakirə olunub.

Səfir baş verənlərdən təəssüfünü bildirib və Cənubi Koreyanın Gürcüstanın ərazi bütövlüyü ilə bağlı mövqeyinin dəyişməz olaraq qaldığını vurğulayıb. Onun sözlərinə görə, Cənubi Koreya Abxaziyanı müstəqil dövlət kimi tanımır, onu Gürcüstanın ayrılmaz hissəsi hesab edir.

Seulda mədəniyyət mərkəzinin açılmasına gəlincə, səfir deyib ki, Cənubi Koreya hökuməti belə bir mərkəzin açılmasına və ya fəaliyyətinə hər hansı bir icazə verməyib, buna görə də yerli qanunvericiliyə əsasən onun fəaliyyət göstərməsi mümkünsüzdür.

Qeyd edək ki, Seulda “Abxaziya-Koreya Mədəniyyət Mərkəzi” sentyabrın 23-də açılıb. Cənubi Koreya parlamentində baş tutmuş mərasimdə Abxaziyanın “mədəniyyət naziri” Daur Kove də iştirak edib.