Gürcüstanda qəzaya uğrayan Türkiyə Hərbi Hava Qüvvələrinə məxsus C-130 nəqliyyat təyyarəsi F-16 qırıcıları üçün 6 ton ehtiyat hissələri daşıyırmış. Təyyarədə nə partlayıcı maddə, nə də sursat olmayıb.

Xalqcebhesi.az xəbər verir ki, bu barədə “Milliyet” qəzeti məlumat yayıb.

Türkiyə Qarabağ müharibəsində qələbənin ildönümü ilə bağlı Azərbaycanda keçirilən şənlikdə iştirak edib. Bu məqsədlə Respublika Hərbi Hava Qüvvələrindən 6 ədəd F-16 qırıcısı oraya gətirilib. C-130 bu təyyarələr üçün ehtiyat hissələri və bu qırıcılara xidmət etmək üçün texniki işçilər daşıyırdı. Qəzetin məlumatına görə, "geri qayıdan təyyarə F-16 üçün ehtiyat hissələri və istehlak materialları daşıyırdı və altı tonluq yükdə sursat və ya partlayıcı maddə yox idi".

"Milliyet"in qeyd etdiyi kimi, fəlakətin səbəbləri ilə bağlı nəzəriyyələr arasında gövdə korroziyası ehtimalı nəzərdən keçirilir. İlkin hesablamalara görə, qəzaya uğrayan təyyarənin quyruq hissəsi hələ havada ikən gövdədən ayrılan ilk hissə olub.

Nəşr onu da bildirir ki, Türkiyə Hərbi Hava Qüvvələri 13 C-130E nəqliyyat təyyarəsi və altı C-130B nəqliyyat təyyarəsini idarə edir, onlardan bəziləri modernləşdirilmişdir. Qəzetin yazdığına görə, qəzaya uğrayan təyyarə 2010-cu ildə Səudiyyə Ərəbistanından alınıb və 2020-ci ildə əsaslı təmir və texniki baxışdan keçib. Bu təyyarənin müntəzəm olaraq tam texniki baxışı 2026-cı ilin iyul ayına planlaşdırılıb.

Məryəm Quliyeva