Avropa İttifaqı Ermənistana dəstək proqramı çərçivəsində 15 milyon avro ayırıb.

APA xəbər verir ki, bunu Avropa İttifaqının xarici siyasət və təhlükəsizlik üzrə ali nümayəndəsi Kaya Kallas Brüsseldə Ermənistanın xarici işlər naziri Ararat Mirzoyanla mətbuat konfransında deyib.

Onun sözlərinə görə, bu vəsait Ermənistana mina ilə bağlı təlimlərdə və digər etimad qurucu tədbirlərinin maliyyələşdirilməsində kömək edəcək.

“Bununla paralel olaraq, Ermənistan digər çağırışlarla da üz-üzədir. Gələn il keçiriləcək parlament seçkiləri ərəfəsində Rusiya və onun proksiləri Ermənistanda dezinformasiya kampaniyalarını gücləndirir. Biz eyni gücləri Moldovada görürük və plan eynidir. Ermənistana ayırdığımız vəsait həm də xarici müdaxilələrin aşkarlanması, analiz edilməsi və neytrallaşdırılması istiqamətində də xərclənəcək”, - Kaya Kallas bildirib.