Pakistan İran və ABŞ arasında İranın nüvə proqramı səbəbindən yaranmış gərginliyin azalmasına yönəlmiş birbaşa danışıqları dəstəkləyir.

Xalqcebhesi.az xəbər verir ki, bu barədə Pakistan Xarici İşlər Nazirliyinin rəsmi nümayəndəsi Tahir Andrab bildirib.

“Pakistan İranla bağlı hər hansı bir dialoq və diplomatiya formatında iştirak etməyə hazır olsa da, biz müvafiq tərəfləri danışıqların mümkün qədər birbaşa formatda aparılmasına çağırırıq”, — deyə diplomat bildirib. “İslamabad İran və ABŞ arasındakı konflikti həll etmək üçün bütün dialoq və diplomatiya təşəbbüslərini dəstəkləyir.”

Andrab əlavə edib ki, Pakistan ümid edir ki, 6 fevralda Omanın paytaxtı Maskat şəhərində keçirilmiş İran-ABŞ qeyri-birbaşa danışıqlarında iştirakçıların pozitiv münasibəti növbəti danışıqlar prosesində qorunacaq. “Maskatdakı danışıqlar Vaşinqton və Tehran arasındakı münasibətlərdə gərginliyin azaldılması istiqamətində pozitiv addım oldu”, — deyə o bildirib.

Maskatdakı qeyri-birbaşa İran-ABŞ danışıqları regional gərginliyin artdığı bir dövrdə keçirilib, bu isə ABŞ-ın hərbi mövcudluğunun genişləndirilməsini və Prezident Donald Trampın İranın nüvə proqramı ilə bağlı razılaşma əldə olunmazsa ciddi nəticələr olacağı barədə xəbərdarlıqlarını da əhatə edib.

Məryəm Quliyeva