Gunaz TV-nin məlumatına görə, Qərbi Azərbaycan əyaləti; Urmu (Urmiyə) şəhərində şəhərdaxili taksi və avtobus gedişhaqları 60 faiz artırılıb. Bu artım onsuz da ağır iqtisadi böhran altında yaşayan vətəndaşların üzərinə yeni yük qoyub.

Urmu bələdiyyəsinin Yük və Sərnişin Nəqliyyatının İdarəedilməsi Təşkilatının rəhbəri Fəxrəddin Məsumzadə bildirib ki, bu artım ölkədə rəsmi olaraq elan edilən 59 faizlik illik inflyasiya əsasında həyata keçirilib.

O deyib: “Edilən məlumatlandırmaya əsasən, şəhərdaxili taksilərdə yeni tarif bir neçə gündür tətbiq olunur.”

Məsumzadə avtobus qiymətləri ilə bağlı da açıqlamasında bildirib: “Kart-bilet proqramında yaranan texniki problemə görə qiymət artımı hələlik nağd şəkildə tətbiq olunur. Həftənin sonunadək proqram problemi aradan qaldırıldıqdan sonra yeni tarif kart sistemində də tətbiq ediləcək.”

O, həmçinin Urmunun taksi parkının acınacaqlı vəziyyətinə diqqət çəkərək deyib ki, hazırda şəhərdə fəaliyyət göstərən 4 min 634 taksidən 60 faizi 10 ildən çox yaşı olan köhnə avtomobillərdir və yenilənməyə ehtiyac duyur.

İran rejiminin müharibə, iqtisadi idarəetmədə uğursuzluq və artan inflyasiya siyasəti nəticəsində qiymət artımları xüsusilə aşağı gəlirli ailələrin həyatını daha da çətinləşdirib.