"Azərbaycan Dəmir Yolları" QSC (ADY) Naxçıvan dəmir yolu şəbəkəsində yenidənqurma işlərini davam etdirir.

ADY-dən "APA-Economics"ə verilən məlumata görə Dəmir yolu xətti üzrə Azərbaycan–Ermənistan sərhədindən Ordubad istiqamətində 6 km-lik hissədə torpaq işləri tamamlanıb, Salamməlik stansiyasında başlayaraq 700 metrlik hissədə yeni rels-şpal çərçivələri quraşdırılıb, zəruri mühəndis qurğularının inşası davam etdirilir.

Məlumata görə, Yenidənqurma tamamlandıqdan sonra dəmir yolunun illik yükötürmə qabiliyyəti 15 milyon ton olacaq.

"Yeni bağlantı Naxçıvanı Azərbaycanın əsas dəmir yolu şəbəkəsi ilə birləşdirəcək, həmçinin Zəngəzur dəhlizinə qoşularaq Türkiyəyə birbaşa dəmir yolu çıxışını təmin edəcək və Azərbaycanın tranzit imkanlarını əhəmiyyətli dərəcədə artıracaq", - məlumatda qeyd olunur.