Əgər dərs 60 kvadratmetrlik sinif otağında keçiriləcəksə, onda bu sinifdə partalar 1,5 metr məsafə ilə düzüləcək.

Bunu Təhsil Nazirliyinin Ümumi və məktəbəqədər təhsil şöbəsinin müdiri Vəfa Yaqublu Nazirlər Kabinetinin "Karantin rejimi dövründə təhsil müəssisələrində tədris və təlim-tərbiyə prosesinin təşkilinin müvəqqəti Qaydaları" barədə Qərarına həsr olunmuş onlayn mətbuat konfransında deyib.

Onun sözlərinə görə, siniflərdə olan şagirdlərin sayı otaqların həcmi, onlar arasındakı məsafə ilə bağlıdır: “ Siniflərin genişliyi nə qədər imkan versə, o qədər şagird həmin otaqda dərs keçəcək, siniflər buna uyğun yarımqruplara bölünəcək. Yəni bu, sinif otağının həcmindən asılıdır. Hər parta arxasında bir uşaq əyləşəcək. Ehtimal var ki, xüsusi sıxlığı olan məktəblərdə valideynlərin çoxu öz uşağını məktəbə göndərməyəcək. Bu baxımdan, bu məktəblərdə şagird sayı azalacaq. Hər yarım qrup üçün xüsusi dərc cədvəli hazırlanacaq. Bu cədvəllər nazirliyin səhifəsində paylaşılıb”.