Bosniyada 500 min insan güclü daşqınlar nəticəsində evakuasiya edilib və yaxud evlərini tərk etmək məcburiyyətində qalib.
APA-nın BBC-yə istinadən verdiyi xəbərə görə, Bosniya xarici işlər naziri Zlatko Laqumciya 1992-1995-ci illərdəki müharibədən sonra ölkədə bu qədər qaçqının olmadığını deyib.
Bosniya və Herseqovinanın 4 milyonluq əhalisinin dörddə biri içməli su qıtlığı şəraitində yaşayır. 100 min yaşayış evi dağılıb, ölkənin yol infrastrukturuna ciddi ziyan dəyib.İrimiqyaslı fəlakətə səbəb yağan aramsız leysan yağışları olub.
Balkan yarımadasında son bir neçə gün ərzində baş verən daşqınlar nəticəsində ən azı 40 nəfər ölüb. Xilasedicilərin ayrı-ayrı yaşayış məntəqələrinə çata bilmədiyindən həlak olanların sayının artma ehtimalı böyükdür.