Rusiya Ukraynanın böyük şəhərlərinə raket zərbələrini gücləndirir, ən effektiv uzaqmənzilli silahların istehsalını artırır və ordusunun sıralarını Şimali Koreyadan yeni əsgərlərlə doldurur.

Bu barədə “Newsweek” məlumat yayıb.

Nəşrin yazdığına görə, bunlar Rusiyanın müharibənin yeni, daha intensiv mərhələsini və ya hansısa formada eskalasiya planlaşdırdığını göstərən əlamətlərdir.

Kral Birləşmiş Xidmətlər İnstitutunun (RUSI) əməkdaşı Emili Ferris bildirib ki, Rusiya eskalasiyaya hazırlaşsa da, bu, Kremlin parlament seçkilərindən sonra mütləq hücumu gücləndirəcəyi anlamına gəlmir.

“Rusiya bunu edə bilərmi? Əlbəttə. Amma hər şey Rusiyanın konkret məqsədə - bütün Donbası ələ keçirməyə nail ola biləcəyinə inanıb-inanmayacağından asılıdır”.

Ekspertlər eskalasiya üçün bir neçə ssenari irəli sürürlər. Bu ssenarilər son dərəcə az ehtimal olunan variantlardan, məsələn, taktiki nüvə silahından istifadə edilməsindən tutmuş Kremlin istəmədiyi variantlara, məsələn, Donbası ələ keçirmək üçün irimiqyaslı səfərbərliyə qədər dəyişir.

Bir çox ekspert ən ehtimal olunan variantın Rusiyanın daha çox uzaqmənzilli raketlərdən istifadə etməklə Ukraynanın kritik infrastrukturuna zərbələr endirməsi olduğunu düşünür.

“Bu, tamamilə mümkündür”, - Ferris hesab edir.

Hazırda ballistik və hipersəs raketləri Ukraynanın hava hücumundan müdafiə vasitələrinin çatışmazlığı şəraitində ələ keçirməsi ən çətin olan silahlardır.

Ukrayna, Cənubi Koreya və Qərbin qiymətləndirmələrinə görə, Şimali Koreya Rusiyaya sayı 50 minə çata biləcək canlı qüvvə ilə yanaşı, artilleriya mərmiləri və ballistik raketlər də verib. Nəşr yazıb ki, əlavə on minlərlə hərbçi bu qədər yüksək itkilər fonunda şəxsi heyət sayını qorumağa çalışan Rusiya ordusunu gücləndirəcək.

Yeni səfərbərlik müharibənin Rusiyaya göstərdiyi təzyiqin səviyyəsini nümayiş etdirərdi. Mənbə xatırladıb ki, Kreml 2022-ci ilin payızında 300 min ehtiyatda olan hərbçini səfərbər edəndə, Rusiyanın müxtəlif bölgələrində etirazlar başlamış və on minlərlə insan hərbi xidmətdən yayınmaq üçün ölkəni tərk etmişdi. Növbəti aylarda yeni böyük hücum üçün yüz minlərlə əlavə hərbçi mühüm əhəmiyyət daşıyardı.