Koreya Respublikasının hökuməti Koreya Xalq Demokratik Respublikasını təxribata çəkmək niyyətində olmadığını bəyan edib.

Bu barədə Cənubi Koreya prezident administrasiyası KXDR ərazisinə pilotsuz uçuş aparatlarının buraxılması ilə bağlı vəziyyətə münasibət bildirərkən açıqlama verib.

Prezident administrasiyasında vurğulanıb ki, hökumət bir daha Şimalı təhrik etmək niyyətində olmadığını təsdiqləyir. Rəsmilər pilotsuz uçuş aparatları ilə bağlı insident üzrə araşdırmaya başlandığını və nəticələrin ictimaiyyətə açıqlanacağını bildiriblər.

Administrasiyanın məlumatına görə, hökumət Cənub və Şimal arasında gərginliyin azaldılması və qarşılıqlı etimadın möhkəmləndirilməsi məqsədilə praktiki tədbirlər görməyə davam edəcək.