Azəri Gənclər Alyansı Azərbaycan Gənclər Fondunun maliyyə dəstəyi ilə
"Mən təhsil almaq istəyirəm, ərə getmək yox!" adlı maarifləndirmə layihəsini həyata keçirib. Layihə çərçivəsində ölkəmizdə erkən nikahların daha çox müşahidə olunduğu cənub bölgəsində - Lerik, Lənkəran, Astara və Cəlilabad rayonlarının kənd məktəblərində 11-15 yaşlı yeniyetmə qızlar və onların valideynləri üçün təlimlər başa çatıb.
Təlimlərdə hədəf eyni zamanda, yeniyetmə qızları və onların zorla ərə verməyə çalışan valideynləri erkən nikaha sövq etməkdən çəkindirmək və beləliklə də, ölkəmizdə erkən nikah probleminin maariflənmə yolu ilə qismən də olsa azalmasına nail olmaq idi. "Biz erkən nikahlara yox deyirik! "şüarı ilə həyata keçən maarifləndirici təlimlərdə yeniyetmə qızlar üçün liderlik təlimləri və ictimai müzakirələr aparılıb, daha sonra isə onların valideynləri ilə ayrıca maarifləndirmə təlimləri uğurla həyata keçirilib.
Azəri Gənclər Alyansının sədri Leyla Sadıqova bildirib ki, təlimlər zamanı yeniyetmə qızlar arasından lider qızlar seçilərək problemə qarşı vahid şəbəkə yaradılacaq və daha sonra onlarla mütəmadi əlaqə saxlanılacaq. Tədbirlər sırasında valideynlərin iştirakı ilə ictimai dinləmələr və müzakirələr keçirilib. Valideynlər erkən nikahlara qarşı öz kəndlərində maarifləndirmə işlərini davam etdirəcəklərini bildirbilər.
Sonda gənc qızlar və valideynlərin uğur hekayələri paylaşılıb