Bu ilin 6 ayı ərzində respublika yollarında moped və motosiklet sürücülərinin təqsiri səbəbindən 17 yol-nəqliyyat hadisəsi baş verib, 4 nəfər həyatını itirib, 16 nəfər xəsarət alıb.

APA xəbər verir ki, bu barədə Daxili İşlər Nazirliyi Nəqliyyatı İntellektual İdarəetmə Mərkəzi motosiklet, moped, skuter, veleosiped idarə edənlərə müraciətində deyilir.
Məlumata görə, paytaxt Bakıda qaydaların pozulması səbəbindən qeydə alınan 7 qəzada isə 9 nəfər xəsarət alıb.

Bildirilib ki, qəzalar ən çox aşağıdakı səbəblərən baş verib:

1. Svetoforun qırmızı işığında keçmək;
2. Hərəkəz zamanı ara məsafəsi saxlamamamaq;
3. Təhlükəli manevrlər etmək;
4. Yol nişanlarının tələblərinə diqqət yetirməmək;
5. Özləri və sərnişinləri qoruyucu dəbilqələrdən istifadə etməmək;
6. Nəqliyyat vasitələrini sürətlə idarə etmək.

"Nəticədə bu cür nəqliyyat vasitələrini idarə edən bəzi sürücülərin ciddiyə almadığı, bəzən yollarda onların irəli düşmək, bəzən də bilərəkdən qaydaları pozmaq istəyi, sadəcə qəza statistikası deyil, kimlərinsə valideynsiz və övladsız qalması ilə nəticələnən faciələrə səbəb olub. Bu faciələrin yaşanmaması üçün isə silsilə tədbirlərin davamı olaraq Nəqliyyatı İntellektual İdarəetmə Mərkəzi və Bakı Şəhər Baş BPİ-nin DYP İdarəsi birgə ikitəkərli nəqliyyat sürücülərinə qaydalar izah olunub, onlarla maarifləndirci söhbətlər aparılıb", məlumatda deyilir.