Akademik İbrahim Cəfərov,
Bitki Mühafizə və Texniki Bitkilər Elmi-Tədqiqat İnstitunun direktoru

Azərbaycan Respublikasında hüquqi dövlət quruculuğu, milli suverenliyin möhkəmləndirilməsi və humanist dəyərlərin qorunması Prezident İlham Əliyevin həyata keçirdiyi dövlət siyasətinin əsas istiqamətlərini təşkil edir. “Konstitusiya və Suverenlik İli” münasibətilə dövlət başçısının amnistiya elan edilməsi təşəbbüsü də məhz bu siyasətin məntiqi davamı, hüquqi dövlətçilik və mərhəmət prinsiplərinin bariz nümunəsidir.

Müstəqil Azərbaycan dövlətinin möhkəm bünövrəsi xalqımızın Ümummilli Lideri Heydər Əliyevin siyasi iradəsi və xilaskarlıq missiyası nəticəsində formalaşıb. Ulu Öndərin rəhbərliyi ilə qəbul edilən Azərbaycan Respublikasının Konstitusiyası müasir dövlətçiliyimizin hüquqi əsaslarını müəyyənləşdirərək demokratik, hüquqi və dünyəvi dövlət modelinin əsasını qoyub. Bu möhkəm hüquqi təməl üzərində qurulan dövlət siyasəti bu gün Prezident İlham Əliyev tərəfindən ardıcıl, qətiyyətli və uğurla davam etdirilir.

Prezident İlham Əliyevin siyasi fəaliyyətinin mərkəzində insan amili, vətəndaş rifahı, sosial ədalət və mərhəmət prinsipləri dayanır. Humanizm dövlət başçısının həyata keçirdiyi siyasətin əsas ideoloji sütunlarından biridir. Bu yanaşma cinayət-hüquq siyasətində də öz aydın əksini tapır. Cəzanın yalnız cəzalandırma deyil, eyni zamanda islah və tərbiyə məqsədi daşıması prinsipi ölkəmizdə hüquq sisteminin əsas istiqamətlərindən biri kimi formalaşıb.

Suverenliyimizin tam bərpası, Konstitusiyanın ali hüquqi qüvvəsinin Azərbaycanın bütün ərazilərində təmin olunması xalqımızın əldə etdiyi ən böyük tarixi nailiyyətlərdəndir. Məhz bu mühüm tarixi mərhələ fonunda Prezident İlham Əliyev humanizm və mərhəmət ənənələrinə sadiq qalaraq, cəzadan azad etmənin tərbiyəvi əhəmiyyətinə inanaraq 15 dekabr 2025-ci ildə amnistiya elan edilməsi təşəbbüsü ilə çıxış edib. Bu təşəbbüs azad ediləcək şəxslərin gələcəkdə qanunlara hörmətlə yanaşacağına və cəmiyyətin inkişafına töhfə verəcəyinə olan inamın ifadəsidir.