Mən kinorejissor kimi daha çox sənədli, siyasi mövzularda film çəkməklə məşğulam. Bakıdakı sərgidəki işim Qız qalası haqqındadır. İlk dəfə Bakıya gələndə bu qalanın tarixi, onun haqda olan əfsanə ilə tanış oldum. Bu sözləri “Artım” layihə məkanında keçirilən “Unut bildiklərini, gör mən kiməm” adlı sərgisinin iştirakçısı hollandiyalı rejissor Katya Verheul deyib.
“İntihar edən 14 yaşlı qızın taleyi məni çox təsirləndirdi. Ancaq məsələ ondadır ki, Elina Hacıyevanın ölümü ilə bağlı nə baş verdiyini çox az adam bilir. Bu mövzu bizə maraqlı oldu və qərara gəldik ki, işlərimizi zorakılıq, şayiələr, dedi-qodular mövzusunda sərgiləyək. Bunun üçün mən gənc qızlar arasındakı münasibətlərdən bəhs edən videoçəkilişlərə başladım və çalışdım ki, onlar arasında qarşılıqlı əlaqəni izləyim. Onlara suallar verdim. Evlilik haqqında nə düşündüklərini soruşdum. Mənim üçün yerli insanlarla işləmək çox maraqlı və vacibdir. Mən bu işimi ərsəyə gətirənə qədər yerli təsvir dizaynerləri ilə işlədim. Çünki, yerli incəsənət adamları öz ölkələrinin mədəniyyətini məndən daha yaxşı bilirlər. “Artım” layihə məkanı barədə Hollandiyada olarkən öyrəndim. “Artım”dan dəvət gəldi və mən bunu qəbul etdim. Bakıda iki ay qalmağı düşünürəm. Buranın görməli yerləri ilə tanış oldum və mənim çox xoşuma gəldi. Bir daha bura gələcəyəm”, -deyə K.Verheul bildirib.