Tural Gəncəliyev: “Bu, təkcə Türkiyənin deyil, bütün Yaxın Şərqin problemidir”

“Suriya ordusunun hazırlanması Türkiyə tərəfindən həyata keçirilir. Təbii ki, Türkiyənin Yaxın Şərqdə və xüsusilə də Suriyada maraqları kontekstində məsələyə yanaşsaq, Suriya ordusunun gücləndirilməsi, xüsusilə də ərazi bütövlüyünün qorunması, sərhədlərinin təhlükəsizliyinin möhkəmləndirilməsi çox önəmlidir”.

Bu sözləri Xalqcəbhəsi.az-a açıqlamasında Milli Məclisin deputatı Tural Gəncəliyev deyib.

Deputat qeyd edib ki, İsrail tərəfindən Suriyaya təcavüz edilib: “Suriyanın cənub hissələri, Əs-Süveyda bölgəsi separatçı druzların iştirakı ilə demək olar ki, bir növ mərkəzə tabe olmayıb və daha çox separatçıların əlindədir. Digər tərəfdən Suriyanın şimal-şərqində YPG, PYD terroru qruplarının mövcudluğunu nəzərə alsaq, bu da Türkiyənin, ilk növbədə isə Suriyanın özü üçün ciddi təhlükə yaradır. Ona görə də, Türkiyənin YPG/PYD terror qruplaşmalarına qarşı əməliyyat keçirmə ehtimalı artır. Çünki, bu terrorçu qrupların silahları yerə qoyması, təslim olması ilə bağlı məlumatlar yayılsa da, hələ də ortada konkret fakt yoxdur. Ona görə də, həm Əs-Süveyda bölgəsinin cənub hissəsində, həm şimal-şərq hissəsində terrorçuluğa və separatçılığa son qoyulmalıdır. Bu, təkcə Türkiyənin deyil, bütün Yaxın Şərqin problemidir. Ümumiyyətlə, artıq Suriyanın ərazi bütövlüyünə qarşı qəsdlərə son qoyulmalıdır. Təəssüflər olsun ki, fürsət düşdükcə həm Suriyanın müvafiq qonşuları, həm də terrorçular fürsətdən yararlanmağa çalışırlar”.

Deputatın sözlərinə görə, terror qrupları müvafiq razılaşmaya baxmayaraq, yenə də Suriyanın mərkəzi hökümətinin hakimiyyətini qəbul etmirlər: “Bütün bunlar təbii ki, Türkiyənin Suriyada hərbi əməliyyatlara başlanmasını zəruri edir. Çünki, bu problemlər həll edilməsə, Suriyanın ərazi bütövlüyü problemi davam edəcək, separatçı meyillər artacaq”.

Günel Elxan