Avropa İttifaqı (Aİ) Meta və TikTok-u şəffaflıq qaydalarını pozmaqda ittiham edib.

Xalqcebhesi.az xəbər verir ki, Aİ Komissiyası Facebook və Instagram-ın sahibi Meta və sosial media platforması TikTok-un Rəqəmsal Xidmətlər Aktı (DSA) üzrə şəffaflıq öhdəliklərini pozduğuna dair ilkin nəticələri açıqlayıb.

Bəyanatda Meta və TikTok-un tədqiqatçılara ictimaiyyətə açıq məlumatlara adekvat çıxış təmin etmək öhdəliklərini pozduğu qeyd edilib. Həmçinin qeyd edilib ki, Meta istifadəçilərə qanunsuz məzmun barədə məlumat vermək üçün sadə mexanizmlər və məzmun moderasiyası qərarlarına effektiv şəkildə apelyasiya vermək imkanı vermək üçün Instagram və Facebook-dakı öhdəliklərinə əməl etməyib.

Aİ Komissiyasının ilkin nəticələri təsdiqlənərsə, şirkətlər cərimələrə və uyğunluq əmrinə məruz qalacaqlar.

Aİ-nin texnologiya qaydalarına əsasən, Avropada fəaliyyət göstərən böyük şirkətlər və rəqəmsal platformalar qaydalara əməl etməlidir.

Aİ qaydaları pozan rəqəmsal platformalara qlobal dövriyyənin 6 faizinə qədər cərimə tətbiq edə bilər. Təkrar pozuntular halında, Aİ-də sözügedən rəqəmsal platformaların fəaliyyətinə xitam verilə bilər.

Məryəm Quliyeva