Qarşılıqlı iqtisadi əlaqələr, o cümlədən Azərbaycan Dövlət Neft Fondu və SOCAR-ın İtaliyada yatırımları iki ölkə arasında əlaqələrin gələcəyə hesablanmış strateji əsasda formalaşdığını göstərir.

“APA-Economics” xəbər verir ki, bunu Bakıda keçirilən Azərbaycan–İtaliya İqtisadi Əməkdaşlıq üzrə Hökumətlərarası Komissiyanın VI iclasında energetika naziri Pərviz Şahbazov deyib.

O, iki ölkə arasında münasibətlərin strateji tərəfdaşlıq səviyyəsində inkişaf etdiyini bildirib.

P.Şahbazov bildirib ki, hazırda İtaliya Azərbaycanın ən böyük ticarət tərəfdaşıdır. Azərbaycanın ümumi ticarət dövriyyəsinin təxminən 25%-i, ixracının isə 47%-i bu ölkənin payına düşür. İndiyədək Azərbaycandan İtaliyaya 342 milyon ABŞ dolları, İtaliyadan Azərbaycana isə 805 milyon ABŞ dolları həcmində investisiya yönəldilib.

Nazir vurğulayıb ki, enerji sahəsi əməkdaşlığın əsas istiqamətlərindən biridir. Onun sözlərinə görə, İtaliya Azərbaycanın Avropada neft ixracının 45%-ni, qaz ixracının isə 38%-ni qəbul edir və Trans-Adriatik Boru Kəməri vasitəsilə həyata keçirilən qaz tədarükü İtaliyanın və ümumilikdə Avropanın enerji təhlükəsizliyinə mühüm töhfə verir.