2032-ci ildən etibarən mərhələli şəkildə istismara veriləcək “Xəzər–Qara dəniz–Avropa” Yaşıl Enerji Dəhlizi Avropa bazarına ötürüləcək elektrik enerjisindən İtaliyanın da faydalanmasına imkan yaradacaq.

“APA-Economics” xəbər verir ki, bunu Azərbaycan–İtaliya İqtisadi Əməkdaşlıq üzrə Hökumətlərarası Komissiyanın VI iclasında energetika naziri Pərviz Şahbazov bildirib.

O qeyd edib ki, hazırda İtaliyanın “CESI SpA” şirkəti sözügedən layihə ilə yanaşı, “Mərkəzi Asiya–Azərbaycan” yaşıl enerji dəhlizi üzrə texniki-iqtisadi əsaslandırmaların hazırlanmasında Azərbaycanın məsləhətçi tərəfdaşı qismində iştirak edir.

Nazir vurğulayıb ki, bu təşəbbüslər Azərbaycanla İtaliya arasında enerji sahəsində strateji tərəfdaşlığın daha da dərinləşməsinə xidmət edir.