Avropa İttifaqı struktur qaz təchizatı boşluğu ilə üz-üzədir və bu şəraitdə Cənub Qaz Dəhlizi (CQD) genişləndirilə bilən əsas boru kəməri marşrutu kimi strateji əhəmiyyət daşıyır.

“APA-Economics” xəbər verir ki, bunu Boston Consulting Group şirkətinin icraçı direktoru Marco Tonegutti Bakıda keçirilən Cənub Qaz Dəhlizi Məşvərət Şurasının iclasında bildirib.

Onun sözlərinə görə, Aİ-də daxili qaz hasilatı azalır, idxal asılılığı isə yüksək olaraq qalır. LNG tədarükü artsa da, bu həcmlər qiymət və geosiyasi risklərə həssasdır.

BCG nümayəndəsi qeyd edib ki, Azərbaycan əlavə hasilat potensialına malikdir və onilliyin sonunadək qaz ixracını artırmaq mümkündür. Genişləndirmə texniki baxımdan mümkündür, lakin bunun üçün uzunmüddətli müqavilələr, maliyyələşmə koordinasiyası və siyasi-tənzimləyici sabitlik tələb olunur.

Onun sözlərinə görə, CQD hazırda Avropanın enerji təhlükəsizliyini gücləndirə bilən yeganə genişlənə bilən qeyri-Rusiya boru qazı marşrutudur.