“Azərbaycan və Suriya prezidentləri arasında baş tutan son səfər ikitərəfli münasibətlərin yeni mərhələyə keçdiyini göstərir. Daha əvvəl Antalyada keçirilən forumda görüşmüş liderlər bu dəfə əməkdaşlığın konkret istiqamətlərini müzakirə ediblər. Azərbaycan Suriyada hakimiyyət dəyişikliyindən sonra bu ölkənin ərazi bütövlüyünə və suverenliyinə açıq dəstək verən ilk dövlətlərdən biri olub. Bakı, eyni zamanda, Türkiyə ilə birlikdə Suriyanın bərpasında iştirak etməyə hazır olduğunu bildirib”.

Bu sözləri Xalqcebhesi.az-a açıqlamasında siyasi elmlər üzrə fəlsəfə doktoru, politoloq Züriyə Qarayeva söyləyib.

Z.Qarayeva əlavə edib ki, Prezident İlham Əliyevin tapşırığı ilə yüksək səviyyəli nümayəndə heyətinin Suriyaya səfəri bu niyyətin göstəricisidir: “Azərbaycan Yaxın Şərqdə də fəal siyasət yürüdərək etibarlı tərəfdaş kimi tanınır. Ərazi bütövlüyünü bərpa etdikdən sonra ölkə qlobal siyasətdə yeni tərəfdaşlıq modelləri qurmağa başlayıb. Bu çərçivədə Azərbaycan qazının Suriya bazarına çıxarılması məsələsi də gündəmdədir. Azərbaycan qazına artan tələbat fonunda bu istiqamət strateji əhəmiyyət kəsb edir”.

Politoloq bildirib ki, bundan əlavə, Azərbaycan regionda sakit diplomatiya prinsipi ilə vasitəçilik missiyası həyata keçirir, İsrail-Suriya və Türkiyə-İsrail münasibətlərində konstruktiv rol oynayır: “Müharibədən sonra bərpa sahəsində əldə etdiyi təcrübə isə Suriyanın yenidən qurulmasına töhfə verə bilər. Tarixən müsbət olan Azərbaycan-Suriya münasibətləri indi yeni və real əməkdaşlıq mərhələsinə qədəm qoyur”.

Röya İsrafilova