11 mart tarixində Turan Qastro Turizm Akademiyasının Turizm Agentliyi ixtisası üzrə tələbələrinin 3-cü imtahan və sertifikasiya mərhələsi uğurla yekunlaşıb.

İmtahan mərhələsi tələbələrin turizm sahəsində qazandıqları nəzəri və praktiki biliklərinin qiymətləndirilməsinə həsr olunmuşdu. Proses zamanı iştirakçılar turizm agentliyi fəaliyyəti, müştəri xidməti, tur paketlərinin hazırlanması, satış strategiyaları və turizm bazarının xüsusiyyətləri üzrə bilik və bacarıqlarını nümayiş etdiriblər. Bu mərhələ onların gələcək peşə fəaliyyətinə hazırlığını müəyyənləşdirmək baxımından mühüm əhəmiyyət kəsb edib.

İmtahan şəffaf və obyektiv şəkildə aparılıb, tələbələrin hazırlıq səviyyəsi xüsusi komissiya tərəfindən diqqətlə qiymətləndirilib. Tədbiri İnkişafa və İslahatlara Dəstək İctimai Birliyinin sədri Ramil Əliyev və Bakı İctimai Əməkdaşlıq Mərkəzinin direktoru Rauz Zeyni də izləyərək imtahanın gedişi ilə tanış olublar və tələbələrin bilik və bacarıqlarını yüksək qiymətləndiriblər. Qonaqlar turizm sahəsində peşəkar kadrların hazırlanmasının ölkədə turizm sektorunun inkişafı üçün böyük əhəmiyyət daşıdığını vurğulayıblar.

Sonda imtahan mərhələsini uğurla başa vuran tələbələrə sertifikatlar təqdim olunub. Sertifikat alan tələbələr gələcəkdə turizm agenti kimi fəaliyyət göstərmək üçün zəruri bilik və bacarıqlara sahib olduqlarını təsdiqləyiblər.

Qeyd edək ki, Turan Qastro Turizm Akademiyası turizm və qastronomiya sahəsində peşəkar kadrların hazırlanmasına yönəlmiş təlim və inkişaf proqramları həyata keçirir. Belə sertifikasiya mərhələləri tələbələrin peşəkar inkişafına və turizm sektorunda keyfiyyətli xidmət səviyyəsinin yüksəlməsinə xidmət edir.