İngiltərə Xarici İşlər Nazirliyinin sözçüsü yazılı açıqlamada bildirib ki, dünən Londonda keçirilən görüşdə Ukraynanı Prezident Aparatının rəhbəri Andriy Yermak, xarici işlər naziri Andrii Sybiha və müdafiə naziri Rustem Umerov təmsil edib.

Görüşün İngiltərə, Fransa və Almaniyadan ibarət E3 ölkələri ilə ABŞ və Ukrayna nümayəndələri arasında keçirildiyini bildirən sözçü, "Bütün tərəflər Prezident Trampın qətlləri dayandırmaq, ədalətli və davamlı sülhə nail olmaq əzminə güclü dəstəyini bir daha təkrarladılar" deyib.

Sözçü danışıqların uğurla keçdiyini vurğulayaraq əlavə edib: "Gələcək addımlar barədə ümumi razılığa gəlməkdə mühüm irəliləyiş əldə olunub. Yaxın koordinasiyanın davam etdirilməsi razılaşdırılıb".

Qeyd edək ki, ötən həftə İngiltərə, Fransa və Almaniya Rusiya-Ukrayna müharibəsini müzakirə etmək üçün Parisdə ABŞ və Ukrayna rəsmiləri ilə görüşüb və bu görüşün davamının Londonda keçiriləcəyi açıqlanıb.