Rusiya Xarici İşlər Naziri Sergey Lavrov bildirib ki, zənginləşdirilmiş uranın işlənməsi sahəsində İrana kömək etməyə hazırdırlar. Lavrov qeyd edib: “Bu sahədə texnoloji imkanlarımız var. Bu texnologiyaları paylaşmağa hazırıq.”

Xalqcebhesi.az xəbər verir ki, Lavrov bu açıqlamanı Braziliyanın Rio-de-Janeyro şəhərində keçirilən 17-ci BRICS Liderlər Sammitindən sonra təşkil etdiyi mətbuat konfransında verib. O, NATO-nun fəaliyyətlərinə də toxunaraq deyib: “NATO-nun genişlənməsi nə üzvlərinə, nə də başqalarına fayda gətirmədi. NATO daxilində fikir ayrılıqları dərinləşir. İdeologiyaların zorla qəbul etdirilməsinə qarşı, milli maraqları əsasında hərəkət etmək istəyən ölkələrin sayı artır.”

Lavrov həmçinin ABŞ-ın daha əvvəl İranın nüvə proqramı üzrə sazişdən çıxdığını xatırladaraq deyib:
“Bundan sonra İranın zənginləşdirilmiş uranı məhdudlaşdırmaqla bağlı heç bir öhdəliyi qalmadı. İndi bu məsələ yenidən müzakirə olunur. Bizim bu sahədə texnoloji imkanlarımız var. Bu texnologiyaları paylaşmağa hazırıq. Zənginləşdirilmiş uranın artıqlığı Rusiyaya gətirilə, burada emal edilə və sonradan nüvə enerji stansiyalarında istifadə üçün İrana qaytarıla bilər.”

Məryəm Quliyeva