Fransanın cənubunda yerləşən Ardeş departamentində meşə yanğını başlayıb, artıq 10 hektar ərazi yanıb.

“Report”un məlumatına görə, bu barədə BFMTV telekanalı departamentin prefekturasına istinadən xəbər verir.

"İyulun 17-də Ardeş departamentində Lubares və Valqorj şəhərləri arasındakı dağlıq ərazidə yanğın başlayıb", - qurumdan bildirilib.

Qeyd olunub ki, ərazinin kəskin relyefi alovun sürətlə yayılmasına şərait yaradır. Mütəxəssislərin qiymətləndirməsinə görə, yanğının sahəsi 60 hektara çata bilər.

Hadisə yerində 80 yanğınsöndürən işləyir. Hakimiyyət orqanları yanğının söndürülməsi üçün 40 texnika, üç təyyarə və bir helikopter göndərib.