ABŞ-ın Venesuelaya qarşı hərəkətləri mövcud dünya nizamının dağınıq vəziyyətdə olduğunun daha bir sübutudur, lakin yeni bir dünyanın konturları yalnız yeni ortaya çıxır.

Xalqcebhesi.az xəbər verir ki, Macarıstanın Baş naziri Viktor Orban bu fikri bildirərək, hökumətinin "sülh və təhlükəsizlik yoluna" sadiq qalmaq niyyətində olduğunu təsdiqləyib.

Orban, Prezident Donald Trampın Venesuela lideri Nikolas Maduronu ələ keçirmək üçün icazə verdiyi ABŞ hərbi əməliyyatına toxunaraq bildirib: "Bu ilin ilk günlərində liberal dünya nizamının dağılmaqda olduğuna dair ciddi bir xatırlatma aldıq". Hökumət başçısı qeyd edib ki, Trampın bir il əvvəl Ağ Evə qayıtması liberal dünya nizamına "ölümcül zərbə" olub.

"Lakin yeni dünya hələ də formalaşmaqdadır. Qarşıda daha qeyri-sabit, gözlənilməz və təhlükəli illər var", Orban Facebook-da yazıb.
O qeyd edib ki, əgər onun partiyası Fidesz-Macarıstan Vətəndaş Birliyi qarşıdan gələn aprel parlament seçkilərində qalib gələrsə, Macarıstan "sülh və təhlükəsizlik yolu ilə gedəcək". Baş nazir Macarıstanın Ukraynadakı "müharibədən kənarda qalacağını" əlavə edərək, "Biz macar gənclərini cəbhəyə göndərmək istəmirik və ölkəni və Macarıstan iqtisadiyyatını məhv etmək istəmirik" deyib.

Məryəm Quliyeva