Suriyadakı hadisələrin İraq ərazisinə də yayılması cəhdləri və bu prosesdə türkmən qurum və təşkilatlarının hədəfə alınması İraqdakı türkmənlərin təhlükəsizliyi və milli kimliyi baxımından son dərəcə narahatedici mənzərə yaradır.

Xalqcebhesi.az xəbər verir ki, bunu İraq Türkmən Cəbhəsi Siyasi Bürosunun üzvü Mardin Gökkaya deyib.

O, qeyd edib ki, keçmişdə Kərkük, Süleymaniyyə və Ərbil başda olmaqla türkmənlərin yaşadığı şəhərlərdə müxtəlif bəhanələrlə təşkil edilən aksiyalar zamanı İraq Türkmən Cəbhəsi və digər milli qurumlara qarşı məqsədli hücumlar həyata keçirilib:

"Seçki proseslərindən əvvəl ofislərimizə qarşı analoji təxribatlar cəmiyyətdə şüurlu şəkildə iğtişaş və qeyri-sabitlik yaratmaq məqsədi daşıyırdı. Bu gün Ərbildə İraq Türkmən Cəbhəsi və TEBA-nı hədəf alan hadisələr bu təhlükəli yanaşmanın davamlılığını açıq şəkildə nümayiş etdirir.

Biz oxşar cəhdlərin təkrarlanmasının qarşısını almaq üçün ciddi, davamlı və çəkindirici tədbirlərin dərhal həyata keçirilməsinə, o cümlədən təqsirkarların müəyyən edilməsinə və onların qanuni məsuliyyətə cəlb edilməsinə çağırırıq".

Cavid