Türk İnvestisiya Fondu maliyyələşdirmə fəaliyyətlərinə başladığını elan edib.

Türk İnvestisiya Fondunun İdarəçilər Şurası cümə günü fondun əməliyyat fəaliyyətlərinə başladığını, maliyyələşdirmə fəaliyyətlərinin isə 2026-cı ilin birinci rübünün sonunadək start götürəcəyini elan edib.

Məlumata görə, bu qərar fondun yaradılma mərhələsindən maliyyələşdirmə fəaliyyətlərinin operativ icrası mərhələsinə keçidini göstərir.

Görüş Qırğızıstan Respublikasının Prezidenti Zati-aliləri Sadır Japarovun dəvəti ilə Bişkekdə keçirilib və Qırğızıstanın İqtisadiyyat və Ticarət naziri cənab Bakıt Sıdıkov tərəfindən görüşə ev sahibliyi edilib.

Qeyd edək ki, Türk İnvestisiya Fondu türk dövlətləri tərəfindən birgə təsis edilən və üzv ölkələr üzrə layihələrin maliyyələşdirilməsi mandatına malik ilk beynəlxalq maliyyə institutudur.

Fondun məqsədi ticarətin genişlənməsi, konnektivliyin yaxşılaşdırılması və sərhədlərarası investisiyaların artırılması vasitəsilə türk dövlətləri arasında iqtisadi əlaqələrin möhkəmlənməsinə dəstək verməkdir.

Şura qeyd edib ki, Fondun əməliyyat fəaliyyətlərinə başlamaq qərarı üzv ölkələrdə resursların istifadəsinə və prioritet layihələrin irəlilədilməsinə dair yüksələn gözləntilərə cavab verir.

İdarəçilər Şurası Bişkekdə keçirilən ikinci sessiya zamanı fondun 2024-cü il üzrə illik hesabatını və auditor yekun maliyyə hesabatlarını təsdiqləyib, şuranın daxili qaydalarını qəbul edib və fondun imtiyazlı kreditor statusunu bir daha təsdiqləyib.

Fond həmçinin gələcək birgə maliyyələşdirmə mexanizmlərinə zəmin yaratmaq üçün bir sıra regional və beynəlxalq maliyyə institutları ilə ilkin məsləhətləşmələr aparıb.

Özbəkistanın qubernatoru, Özbəkistan Respublikasının İnvestisiya, Sənaye və Ticarət naziri cənab Laziz Kudratov İdarəçilər Şurasının sədri seçilib. Azərbaycanın Qubernatoru, Azərbaycan Respublikasının İqtisadiyyat naziri cənab Mikayıl Cabbarov isə sədr müavini seçilib. Hər iki şəxs növbəti illik iclasa qədər bu vəzifələri icra edəcək.

Şura həmçinin 2026-cı ilin ikinci yarısında üçüncü illik iclasın Daşkənddə keçirilməsini nəzərdən keçirməyə razılıq verib.