Kriptovalyuta bazarında son 24 saatda qarışıq dinamika qeydə alınıb.

“APA-Economics” CoinMarketCap platformasına istinadən xəbər verir ki, qlobal kripto bazarının ümumi kapitallaşması 1,29% azalaraq 2,3 trln. ABŞ dollarına enib.

Bazarda qorxu əhval-ruhiyyəsi güclənib. “Fear & Greed” indeksi 15 bənd səviyyəsində qərarlaşıb ki, bu da “ekstremal qorxu” zonasını göstərir.

"Bitcoin"in qiyməti 0,71% azalaraq 66 935,72 ABŞ dolları olub. "Ethereum" 1,83% ucuzlaşaraq 1 978,90 dollara enib. BNB-nin qiyməti isə 0,81% azalıb.

Bununla belə, qızıl təminatlı tokenlərdə artım müşahidə olunub. PAX Gold 1,09%, Tether Gold isə 0,88% artıb.

Digər tərəfdən, "Bitcoin Cash"in qiyməti 1,47%, "Zcash"ın qiyməti 5,42% azalıb. Monero isə 0,65% bahalaşıb.

Analitiklərin fikrincə, bazarda sutkalıq dəyişikliklərin əsas səbəbi Yaxın Şərqdə, xüsusilə İran ətrafında artan hərbi-siyasi gərginlik fonunda investorların risk iştahının azalmasıdır. ABŞ və İsrailin İranla bağlı hərbi əməliyyatları qlobal maliyyə bazarlarında qeyri-müəyyənliyi artırıb. Bu isə riskli aktivlərdən, o cümlədən kriptovalyutalardan vəsait çıxışını sürətləndirərək satış təzyiqini gücləndirib.