
Hikmnət Babaoğlu: "Sadəcə ayrı-ayrı ideologiyanın daşıyıcıları legitim hakimiyyətə qarşı çıxmağa çalışdılar"
"Türkiyədə ordu xəyanətə qurşanmayıb. Sadəcə ayrı-ayrı ideologiyanın daşıyıcıları Türkiyə ordusunun adından istifadə edərək qardaş ölkədə mövcud olan legitim hakimiyyətə qarşı çıxmağa çalışdılar. Onlar Türkiyə xalqı və hakimiyyət tərəfindən layiqli şəkildə cəzalandırıldılar". Bu fikirləri millət vəkili, politoloq Hikmət Babaoğlu Türkiyədə baş verən məlum hadisələri şərh edərkən deyib.
Onun sözlərinə görə, bütövlükdə Türkiyədə baş verənlərin məntiqini dərk edib, obyektiv izah etmək üçün 2001-ci ildən bu günə qədər beynəlxalq münasibətlər sistemində baş verən proseslərin mahiyyətinə, ardıcıllığına, məntiqinə diqqət yetirmək lazımdır: "Düşünürəm ki, Türkiyədə baş verən hadisələr bu gün dünyada mövcud olan imperializmin milli dövlətlərə qarşı apardığı siyasətin tərkib hissəsi kimi qiymətləndirmək lazımdır. Bu gün Qərb imperializmi müxtəlif layihələr adı altında Yaxın Şərqin klassik dövlətlərini sırada çıxardı. Bu imperializmin milli dövlətlərə qarşı ilkin hücumu idi və bunu çox ustalıqla etməyi bacardılar. Qərb imperializminin dünyaya hegemonluq siyasəti isə qlobal dövlət fəlsəfəsinə əsaslanır. Onların mənimsədiyi və XXI əsrin beynəlxalq münasibətlərinin keyfiyyətini və hadisələrini şərtləndirən fəlsəfə buradan qaynaqlanır. Qlobal dövlət isə milli dövlətlərin mövcudluğunu qəbul etmir. Qlobal dövlət dünyada vahid dövlət deməkdir. Düşünsək ki, vahid dövlət bir mərkəzdən idarə olunur o zaman biz bunu imperialist mərkəz adlandıra bilərik. Birmənalı şəkildə milli dövlətlərin cəmiyyəti başa düşməlidir ki, bu gün imperializmlə milli dövlətlərin toqquşması baş verir. Bu proses 2001-ci ildən Yaxın şərq və Şimali Afrika layihəsi kimi başladı. İlkin mərhələdə müəyyən mənada Türkiyədən istifadə edildi lakin sonra artıq Türkiyə hədəfə çevrildi. Bu mexanizm çox dəhşətlidir və dayanmadan hərəkət edir. Əgər Suriyada baş verənlərə müəyyən müdaxilə olmasaydı, növbəti mərhələdə biz onu artıq Asiyanın içərilərinə doğru irəlilədiyini görəcəkdik. Düşünürəm ki, Türkiyədə baş verən hadisələr də bu layihənin Türkiyə həlqəsi idi".
Millət vəkilinin fikrincə, o cəmiyyətin ki, fərdləri savadlıdır, siyasi yetkindir və düzgün qərarlar qəbul edə bilir, xalq legitim hakimiyyəti dəstəkləyir, eyni zamanda hakimiyyətdə milli maraqları qorumaq əzmindədir o zaman heç bir imperialist mərkəz milli dövləti yıxa bilməz: "Müəyyən mərhələdə zəiflədə, qalib kimi görünə bilər, amma dövləti yıxa bilməz. Türkiyədə də bu hadisə baş verdi. Yəni Liviya, İraq Türkiyədə təkrar olunmadı. Bunun üçün qardaş ölkəni idarə edən legitim hakimiyyət lazımi işlər gördü və müəyyən proseslərdən yayına bildi. İkinci isə türk xalqının hakimiyyətin yanında olması, onu dəstəkləməsi imperializmin bu oyunu sona qədər başa çatmağa qoymadı və beləliklə də Türkiyənin milli dövləti ayaqda qalmağı bacardı. Düşünürəm ki, bu Azərbaycanın milli maraqlarına cavab verir. Azərbaycanın beynəlxalq münasibətlərində ölkəmizə qarşı səmimi münasibət bəsləyən yeganə dövlət məhz Türkiyədir. Qardaş ölkənin zəifləməsi Azərbaycanın zəifləməsi deməkdir. Azərbaycan prezidenti də dəfələrlə bəyan edib ki, Türkiyə güclü olarsa, Azərbaycanda güclü olacaq. Ona görə də nə qədər ki, Türkiyədə milli siyasi iradə hakimiyyətdədir, qardaş ölkə ərazi bütövlüyünü qoruya bilir və güclənir bu ölkəmizin güclənməsi deməkdir. Bu kontekstdən baxdıqda Türkiyədə baş verənləri imperializminin Türkiyənin milli dövlətinə qarşı bir oyunu, işğal siyasəti kimi səciyyələndirməliyik".