Ermənistan Xarici İşlər Nazirliyinin əməkdaşı başqa bir dövlətin xeyrinə casusluq ittihamı ilə həbs olunub.

Xalqcebhesi.az xəbər verir ki, bu barədə TASS agentliyi Ermənistan İstintaq Komitəsinin mətbuat xidmətinə istinadla məlumat yayıb.

Verilən məlumata görə, bu ilin iyun ayında Ermənistan Xarici İşlər Nazirliyinin əməkdaşı tərəfindən dövlət sirrini təşkil edən məlumatların xarici dövlət nümayəndəsinə ötürülməsi üçün şərait yaratmaq və düşmən fəaliyyətinə yardım göstərməklə dövlətə xəyanət faktı üzrə cinayət işi başlanıb.

Bundan əlavə, 2025-ci ilin avqust ayının ortalarında Yeni Zelandiyada hərbi məhkəmə bir hərbçini xarici dövlətin xeyrinə casusluq cəhdində təqsirli bilərək məhkum edib. Həmin əsgər hərbi bazanın şəkillərini və onun xəritədəki yerini əks etdirən məlumatları əks-kəşfiyyat zabitinə ötürməyə cəhd edib. Həmin zabit əslində gizli şəkildə fəaliyyət göstərən və bu məqsədlə onunla əlaqə quran bir “yalançı alıcı” olub.

Əsgərin hansı ölkə üçün casusluq etdiyi məhkəmə tərəfindən açıqlanmayıb. Məlumata görə, əsgər ona qarşı ifadələr oxunarkən ağlayıb və öz günahını etiraf edib. KİV-in məlumatına görə, bu, Yeni Zelandiyada tarixdə ilk casus ifşası hadisəsidir.

Məryəm Quliyeva