Ağcabədidə təsərrüfatda baş verən yanğın zamanı bir nəfər yanıq xəsarəti alıb, 8 baş iribuynuzlu heyvan tələf olub.

Teleqraf-ın Qarabağ bürosunun xəbərinə görə, yanğın hadisəsi rayonun Təzəkənd kəndi ərazisində baş verib.

Fövqəladə Hallar Nazirliyinin əməkdaşları hadisə yerinə gələnədək kənd sakini Həziyev Müzəffər Ənvər oğluna məxsus təsərrüfatda yanğını söndürməyə çalışan 1958-ci il təvəllüdlü Məmmədova Kifayət Əlif qızı müxtəlif dərəcəli yanıq xəsarətləri alıb.

O, Ağcabədi Mərkəzi Rayon Xəstəxanasına çatdırılıb.

Tövlənin çardağına yığılmış 16 t ot kipindən 8 tonu və tövlənin içində olan 8 baş iribuynuzlu heyvan yanaraq tələf olub.

Hadisə yerinə cəlb edilən FHN-nin Ağcabədi rayon yanğınsöndürmə bölməsinin əməkdaşları yanğını söndürərək tövlədə olan digər heyvanların tələf olmasının və alovun yaxınlıqdakı tikililərə keçməsinin qarşısını alıblar.

Faktla bağlı araşdırma aparılır.