"Ermənistan əvvəllər də hər yerdə "Artsax" adını gündəmə gətirməyə çalışıb. Amma dünya bu ərazini Dağlıq Qarabağ kimi tanıyır". Bunu açıqlamasında millət vəkili, politoloq Rasim Musabəyov deyib. O bildirib ki, bütün beynəlxalq sənədlərdə Dağlıq Qarabağ adı qeyd edilib: "Ona görə ermənilər özlərini öldürsələr də, heç nəyə nail ola bilməyəcəklər. Digər tərəfdən, axı qondarma "Dağlıq Qarabağ Respublikası"nı tanıyan yoxdur. Tanınmış dövlətin adını dəyişmək olar. Lap istəyirlər özlərini imperiya adlandırsınlar, separatçıları kimdir tanıyan?! Onların bu təxribatçı addımları heç nəyi dəyişmir".
Politoloq əlavə edib ki, ermənilər oyun oynamaqda davam edirlər: "Azərbaycan XİN-in mətbuat xidməti tərəfindən məsələyə münasibət bildirilib. Bundan artıq səviyyədə bu cür təxribatçı addımlara görə onlara cavab verməyinə dəyməz. Erməni düşməndir və hər təxribata əl atacaq, amma belə cılız oyunun heç bir əhəmiyyəti yoxdur. Erməni dilində Ermənistan Hayastandır, onu Hayastan kimi tanıyan yoxdur axı. Hər yerdə Ermənistan gedir. Separatçılar 25 ildir özlərini "Artsax" adlandırırlar, amma heç kim bu ifadəni işlətmir. Bu ərazinin beynəlxalq adı Dağlıq Qarabağdır, ona görə də heç nə edə bilməyəcəklər"