Rus qoşunlarının yay hücum əməliyyatı üç istiqamətdə - Pokrovsk, Konstantinovka və Novopavlovkada cəmləşə bilər.

Xalqcebhesi.az xəbər verir ki, bunu ABŞ-ın Müharibənin Öyrənilməsi İnstitutunun Rusiya məsələləri üzrə analitiki Anjelika Evans deyib.

“Son beş ayda Rusiya bölmələrini Velikaya Novoselka və Orexovo ərazilərindən Pokrovsk-Konstantinovka zonasına köçürür, bu da aktiv hərbi əməliyyatların yeni mərhələsinə hazırlıqdan xəbər verə bilər. Rusların bir ildir mühasirəyə almaq istədikləri Pokrovska xüsusi diqqət yetirilir və 2025-ci ilin yayında bu səylər daha da gücləndiriləcək. Son zamanlar Belqorod vilayətinin cənubunda baş verən hücumlar Xarkov vilayətinin şimal hissəsində dayaq nöqtəsini genişləndirmək cəhdi ola bilər. Lakin bir ildir Xarkov istiqamətində ciddi irəliləyişin olmadığını nəzərə alsaq, bu, Rusiya üçün qarşıdakı dövrdə daha az prioritetdir. 2022-ci ildən bəri Rusiya qoşunları sürətli mexanikləşdirilmiş manevrlər aparmaq qabiliyyətini nümayiş etdirməyib. Putinin qələbə konsepsiyası gündəlik 1-2 kilometr irəliləyişlə yorucu hücuma əsaslanır. İtkilər əhəmiyyətlidir, lakin Rusiya komandanlığı bu yanaşmadan razı görünür. Yaxın gələcəkdə Rusiyanın böyük əraziləri sürətlə ələ keçirməsinə imkan verəcək taktika və ya imkanlarda dəyişikliyin olması ehtimalı azdır”, - o bildirib.