Təbii fəlakətlər 2025-ci ilin birinci yarısında qlobal iqtisadiyyata 131 milyard ABŞ dolları həcmində ziyan vurub.

“Report” xəbər verir ki, bu barədə Almaniyanın “Munich Re” təkrarsığorta şirkətinin açıqladığı hesabatda deyilir.

Ümumi itkilərin təxminən 80 milyard dolları sığortalanıb. Bu, “Munich Re”nin 1980-ci ildə statistika aparmağa başlamasından bəri ilin birinci yarısında sığortalanmış zərərlər üzrə ikinci ən yüksək göstəricidir. Daha yüksək səviyyə yalnız Yaponiyada dağıdıcı zəlzələnin və sunamilərin olduğu 2011-ci ilin birinci yarısında qeydə alınıb.

Məlumata görə, meteoroloji fəlakətlər ümumi itkilərin 88 faizini, sığortalananların isə 98 faizini təşkil edib. Zəlzələlər müvafiq olaraq 12 faiz və 2 faiz təşkil edib.