Keniyanın Kvale sahil bölgəsində alman və macar turistləri daşıyan təyyarə qəzaya uğrayıb. Təyyarə qəzasında pilot da daxil olmaqla 11 nəfər həlak olub.

Xalqcebhesi.az xəbər verir ki, Euronews-un məlumatına görə, Masai Mara Milli Qoruğuna gedərkən Keniyanın sahil bölgəsi Kvaledə təyyarə qəzaya uğrayıb. Qəza nəticəsində əksəriyyəti avropalı turistlərdən ibarət 11 nəfər həyatını itirib.

Mombasa Air Safari qəzada 8 macar, 2 alman sərnişin və keniyalı pilotun həyatını itirdiyini açıqlayıb.

Səlahiyyətlilərə görə, Cessna Caravan Diani hava limanından təxminən 40 kilometr (25 mil) aralıda meşəlik, dağlıq ərazidə qəzaya uğrayıb. Aviaşirkət, pilotun Dianidən havaya qalxdıqdan sonra əlaqə qura bilmədiyini və idarəetmə qülləsinin təyyarə ilə əlaqə saxlamaq üçün 30 dəqiqə mübarizə apardığını bildirib.

Mombasa Air Safari bildirib ki, "Hazırda prioritetimiz zərər çəkmiş ailələrə bütün mümkün dəstəyi göstərməkdir".

Qəza yerli vaxtla səhər saat 5:30-da güclü yağış zamanı baş verib. Şahidlər güclü partlayış səsi eşitdiklərini və daha sonra tanınmaz insan qalıqları tapdıqlarını bildiriblər.

Məryəm Quliyeva